Gitinguha karon ni Mayor Tomas Osmeña nga magpabilin ang libuan ka mga molupyo sa Viscom lot diha sa barangay Apas ning siyudad.
Kini taliwa usab sa tinguha sa kagamhanang probinsyal sa Sugbu nga maoy nanag-iya sa maong luna pagbawi na niini.
Nasayran nga ang nahisgutang luna gideklarar na ni Presidente Gloria Macapagal Arroyo niadtong tuig 2003 nga Socialized Housing Site.
Ang maong deklarasyon nagpalig-on sa usa ka ordinansa sa siyudad niadtong Hulyo 14, 1997 nga nagdeklarar usab sa maong dapit isip Socialized Housing Site.
Apan taliwala sa nahisgutang mga deklarasyon gikataho nga determinado ang Kapitolyo pagbawi sa kapin sa 30 ka ektarya niining luna.
Tungod sa maong kalambuan, gusto ni Osmeña nga barugan ni Presidente Arroyo ang proklamasyon niini aron dili mapapahawa ang mga molupyo.
Gipahibalo sa mayor nga iya nang gisultihan ang presidente sa maong problema atol sa pagduaw niini dinhi sa Sugbu sa miaging semana.
“I give her a reminder when she was here….I just simply asked the president to stick to her original proclamation, then she got the document,” sumala ni Osmeña.
Miingon hinuon ang mayor nga wala mohatag og deretsong tubag si Arroyo sa iyang gisulti niini apan siya nagtuo nga kini dili makatalikod sa mga kabus.
“I talk to her very briefly, we’re asking the president to honor her own proclamation but I don’t think she will abandon the poor,”dugang pamahayag ni Osmeña.
Labing minos walo ka mga sitio diha sa barangay Apas ang giingong nalakip sa giproklamar sa presidente nga Socialized Housing Site.
Kini sama sa Panabang, Calvary, Mahayahay, Santo Niño, Plaza, Fatima ug Central Apas nga giingong dunay liboan ka mga molupyo.