Nameligro karon nga ma-demolish ang mga sidewalk vendors diha sa dalan Colon ning dakbayan sa Sugbu tungod kay subling mopahigayon og inspeksyon si City Hall Urban Poor Consultant Gerry Marquez sa mga manindahay diha sa maong dapit.
Naobserbahan ni Marquez nga nagkadaghan ang mga vendors sa dalan Colon nga nakahatag na og kahasol sa sidewalk ilabi na sa pedestrians.
Sa nasayran, halos tanang mga sidewalk vendors sa dalan Colon giingong mga sakop sa Cebu City United Vendors Association (CCUVA).
Nagkanayon si Marquez nga nagkasabot na sila sa presidente sa CCUVA nga si Maria Buanghog kaniadto nga ipatuman ang zero growth sa mga vendors diha sa dalan Colon.
Apan namatikdan sa Urban Poor Consultant nga nagkadaghan ang mga manindahay diha sa nahisgutang dalan nga niladlad sa ilang mga baligya.
Niingon si Marquez nga posibling sa sunod semana sila mupahigayon og imbentaryo sa mga sidewalk vendors diha sa Colon.
Gitataw ni Marquez nga siya dunay lista sa mga karaang mga vendors diha sa dalan Colon ug kadto lang anaa sa iyang listahan ang ipabilin.