Patay ang inahan ug anak human usab gipauwan og mga bala sa wala pa mailhing mamumuno duol sa ilang panimalay sa barangay Tag-amakan lungsod sa Asturias niadtong Miyerkules sa alas 7 sa gabii.
Ang namatay giila sa kapolisan nga sila si Mamerta Bughaw, 53, biyuda kinsa nakaangkon og samad pinusilan sa iyang buko-buko, tuo ug walang bahin sa dughan.
Samtang ang anak nga si Johannes Bughaw, 19, nakaangkon og samad pinusilan sa iyang ulo, dughan ug tiyan nga maoy nakaingon sa ilang hinanaling kamatayon.
Matud pa ni PO1 Dandreb Lambo nga gikahinabi sa Banat News nga natusak-tusak sa mga bala ang lawas sa mag-inahan base sa gipadangat nga report sa ilang mga imbestigador nga didto pa sa area kagahapon sa hapon gumikan kay kagahapon lang sa buntag na report ang maong insidente.
Daling gi-report ni Kapitan Dickenson Hatamusa ang maong insidente nga ang maong barangay adunay gilay-on gikan sa National Highway nga 10 ngadto sa 15 kilometros.
Matud pa niini nga si Hatamusa nagkanayon nga nakadungog na lang sila’g mga boto-boto sa armas niadtong Miyerkules sa gabii ug pagkahapon na sa buntag nahibaw-an nila nga namatay na si Mamerta ug anak nga si Johannes.
Ang mga imbestigador nakakuha sa crime scene og kabhang sa wala matinong kalibre , usa ka kabhang sa shotgun, usa ka kawo nga gituohang iya sa mamumuno.