Usa ka 22-anyos nga babaye ug ang ig-agaw niini gitulis niadtong Martes sa gabii samtang naglakaw sa south coastal road habig sa barangay San Isidro, dakbayan sa Talisay.
Si Angel Fornalles taga sitio Isla Verde sa nahisgutang barangay maoy mitaho sa kapolisan sa nahitabo kanila.
Dihang gipakita sa kapolisan ang mga hulagway sa mga tulisan sa Talisay nailhan sa biktima si Earl Allen Mondarte nga maoy usa sa mitulis kanila.
Matud pa sa biktima nga samtang naglakaw siya ug ang iyang ig-agaw paingon sa ilang balay kalit lang gihunongan sila sa usa ka motorsiklo nga gisakyan sa tulo ka tawo.
Unya usa sa tulo ang mikanaog ug dihadiha gitionan dayon og armas de fuego ang mga biktima ug mipahibawo nga usa kadto ka tulis unya gikuha ang pitaka sa biktima nga may nagkalainlaing importanteng sulod, sama sa cellphone, mga yawe ug kuwarta nga ang tanan mobalor og P6,500.