Kritikal ang kahimtang sa usa ka ex-convict dihang gipusil kini sa duha ka tawo nga nagsakay og motorsiklo didto sa Sitio Cogon, Poblacion I, siyudad sa Carcar atbang nga bahin sa Carcar Academy kagahapon sa alas 9:40 pasado sa buntag.
Ang biktima mao si Stanley Embarnacy, 36, ulitawo, apan may kapuyo ug may mga anak ug kasamtangang nagpuyo sa Pakigne, Minglanilla.
Matud ni PO3 Reynaldo Fuentes sa Carcar City Police Station nga nahinabi sa Banat News nga nasabak ang biktima sa duha ka mga bala sa wala pa matino nga kalibre sa armas.
Midugang si PO3 Fuentes nga usa sa mga agi sa bala mao ang diha sa bukobuko nga milapos sa tiyan sa biktima, samtang may laing samad usab sa iyang bukton.
Miingon si PO3 Fuentes nga nag-parking ang biktima sa iyang traysikad sa atbang nga bahin sa Carcar Academy samtang nagpaabot og pasahero dihang kalit lang miabot ang duha ka tawong nagsakay og motorsiklo ug ang nag-angkas sa likod niini nagtaptap sa nawong.
Nakabantay ang biktima ug misuway unta kini pagdagan apan gipusil kini niadtong nagtaptap sa dagway .
Matud pa ni PO3 Fuentes nga misulti kaniya ang biktima samtang gihatod kini nila sa tambalanan sa Carcar nga lima siya ka higayon nga gipusil apan tungod kay abtik siya ug nakabantay, hinungdan nga duha ra ka bala ang mitaroy sa iyang lawas.
Midugang si PO3 Fuentes nga walay atraso ang biktima gawas niadtong gipatay niya nga may bansagong Cabrillo diha sa maong lugar niadtong tuig 2000.
Apan miingon ang biktima nga iya na kining giserbisyohan sa prisohan ug karon nga gawasnon na siya nagbag-o na sa iyang kinabuhi hinungdan nga nanginabuhi nalang siya isip usa ka drayber sa traysikad.
Miingon ang biktima nga mabuntag ra siya mamasahero didto sa Carcar apan inigkahapon mopauli usab siya ngadto sa Minglanilla tungod kay tua didto ang iyang pamilya.
Gikan sa Carcar Emergency Hospital gibalhin kini ngadto sa usa ka hospital sa dakbayan sa Sugbo aron maatiman dayon ang iyang mga samad pinusilan.
Matud ni PO3 Fuentes nga nagpadayon pa sila sa pag-imbistigar ning maong kaso aron matumbok ang kriminal ug ang motibo usab sa maong krimen.