Patay nang nakit-an ang otso anyos ug tinun-an sa grade one nga batang lalaki human kini nalumos sa sapa didto sa bukirang bahin sa Lower Anislag, lungsod sa Pinamungajan, Cebu niadtong Lunes sa hapon.
Ang otso anyos nga biktima mao si John Paul Canoy, tinun-an sa grade one ug nagpuyo sa nahisgutang lugar.
Matud ni PO2 Clifford Trazo sa Pinamungajan Police Station sa dihang nahinabi sa Banat News subay sa blotter nga gibasehan niini, ang apohan sa biktima nga si Domingo Alfara ug mga ginikanan niini maoy nakakita sa patay’ng lawas nga naglutaw-lutaw na sa maong sapa niadtong Lunes.
Apan pagka-adlaw’ng Martes na kini gi-report sa mga tagtungod sa kapolisan aron ma-blotter ang maong panghitabo ug masayran kun duna bay foul play ang kamatayon niini.
Gitug-an sa apohan sa pagsukitsukit sa kapolisan nga wala nila mabantayi nga milakaw ang bata niadto pang Domingo ug nianang pagka- Lunes sa dihang ilang gipangita tungod kay mo-eskwela nakit-an na lang kini nga patay na ug naglutaw na sa maong sapa.
Gituohan nga naligo sa maong sapa ang bata ug aksidente kining nalumos apan wala usay kasayuran ang mga ginikanan niini kun si kinsa ang iyang mga kauban pagpangaligo sa maong sapa.
Gisuwayan pa unta nila og tabang ang biktima apan nabugtoan gyud kini sa kinabuhi nga wala na lang dad-a pa sa tambalanan.
Gitakdang ipaubos sa autopsy ang patay’ng lawas sa bata aron gyud matino ang hinungdan sa pagkamatay sa biktima nga kasamtangan karong gihaya sa kapilya sa maong lugar.