Gisalikway ni Cebu City Market Administrator Racquel Arce ang pasangil sa mga fish vendors nga niminos ang halin sa ilang baligya human malunod ang M/V Princess of the Stars.
Nagtuo ang mga manindahay nga nahadlok ang mga konsumedor pagpalit og isda tungod sa kabalaka nga kini mikaon og patay’ng lawas sa mga pasahero sa nalunod nga barko.
Gawas niini, gikataho usab nga ang M/V Princess of the Stars, dunay luwan nga makahilo nga kemikal (endosulfan) nga posibleng masuyop usab sa mga isda.
Apan alang kang Arce, ang kamahal sa presyo sa isda diha sa kamerkaduhan maoy nag-unang hinungdan nga dili na ganahang mamalit niini ang mga konsumedor.
“Gi-monitor man nato atong mga satellite market, ang presyo sa isda taas man gihapon kaayo, kung muminos ang demand mutaas ang supply mubarato unta ang baligya, pero wala may pagkunhod sa presyo sa isda mao man lang gihapon, P120, wala man muminos sa P100 matag kilo,” nagkanayon ang market administrator.
Na-obserbahan usab ni Arce nga hapit na motupong ang presyo sa isda sa presyo sa karne hinungdan nga mas pilion sa mga konsumidor ang karne.