Patay ang usa ka 63-anyos nga babaye human maligsi sa Toyota Tamarraw FX samtang mitabok kini sa karsada sa barangay Tunghaan lungsod sa Minglanilla niadtong Biyernes sa gabii.
Ang biktima giila sa kapolisan nga si Fraxedes Lebosada, minyo, lumad nga taga lungsod sa Alegria, Cebu.
Samtang ang drayber sa Tamarraw FX giila nga si Daniel Resgonia, 53, minyo, lumad nga taga Sitio Taboan barangay Guindarohan, Minglanilla apan naa na magpuyo sa barangay Lawaan siyudad sa Talisay.
Matud ni PO2 Avelino Celoria sa Minglanilla Police Station dihang nahinabi sa Banat News sakay sa Ceres bus ang biktima kauban sa iyang anak babaye nga si Virgie gikan sa Alegria paingon sa maong lugar aron moduaw sa iyang kamanghorang anak nga naa na magpuyo sa Minglanilla.
Apan dihang nanaog na sila sa sakyanan wala mabantayi sa anak niini ang biktima nga nag-una nga mitabok sa karsada ug wala sab kini makabantay sa Tamarraw FX nga gikan sa barangay Tungkop, Minglanilla paingon nang mopauli sa siyudad sa Talisay.
Maayong pagkalamba sa biktima diha sa sementado nga karsada dihang naigo kini sa nahisgutang sakyanan.
Daling mihunong ang drayber ug gikarga ang biktima sa iyang sakyanan paingon ngadto sa Minglanilla district hospital apan paglabay sa 10 minutos samtang giatiman sa mga doktor nakabsan kini sa kinabuhi.
Gi-angkon sab sa drayber nga si Resgonia dihang nahinabi sa Banat News nga wala gyud siya makabantay sa biktima nga mitabok sa karsada.
Si Resgonia ang temporaryong gitanggong sa Minglanilla detention cell.