Mokabat sa 20 ka mga barko ang wala tuguting makalawig pangadto sa mga silingang lalawigan tungod sa bagyong “Frank” kagahapon adlawa sumala pa sa mga opisyal sa Philippine Coast Guard Station –Cebu.
Si Chief Petty Officer Vergilio Tibayan sa Coast Guard Station -Cebu dihang gikahinabi sa Banat News nga mga alas onse pasado sa buntag kagahapon gipahibalo sa Pag-asa nga dili na tugutan nga makalawig sa kadagatan ang mga barko nga ubos sa duha ka libo tonelada ang gibug-aton.
Gikabalak-an sa mga awtoridad nga kun moubos pa niini ug tugutang molawig hayan kuso-kusuhon kini og maayo sa dagkong balod tungod sa maong bagyo ug mameligro ang mga pasahero ug tripulante.
Matud pa niini nga ang mga barkong naapektuhan kadtong nagbiyahian sa Samar, Leyte, Bohol ug Masbate.
Hinuon kadtong mga barkong sobra sa dos mil toneladas gitugutan sa paglawig ilabi na kadtong paingon sa kauluhan ug sa Mindanao nga ang rota wala maapektuhi sa bagyong si Frank.
Samtang si Vangie Tolentino sa Pagasa-Mactan nga gikahinabi sa Banat News mitug-an nga mga alas 10:00 pasado sa buntag kagahapong adlawa ang mata sa bagyong Frank nasigpatan padulong sa Eastern Samar nga may gikusgon nga 60 kilometros matag takna ug gibanabanang moagi sa Northern Samar kagahapon sa gabii.
Gipaubos sa signal no 3 ang Samar, samtang number 2 ang ubang mga dapit sa Leyte og signal number 1 sa amihanang bahin sa Sugbu hinungdan nga halos ang kadagatan sa maong mga dapit dagko kaayo ang bawod apil na ang kinatibuk-ang isla sa Sugbu.
Nunot sa pagdiling makalawig ang mga gagmay’ng barko nagpunsisok ang mga nangatanggong nga pasahero diha sa pantalan.
Hinuon kadaghanan hinuon kanila misabot sa sitwasyon gumikan sa peligro dinala sa maong bagyo.