Hatagan sa kagamhanan sa dakbayan sa Sugbu og cash reward ang polis sa Pari-an Police Station nga si PO3 Erwin Ferrer kinsa nasamdan atol sa shoot-out diha sa dalan Sikatuna sa barangay Day-as niadtong Lunes.
Kini maoy gipahibawo ni Mayor Tomas Osmeña human masayod sa talagsaong kaisog sa maong polis nga giingong napusilan atol sa pagtubag niini og alarma.
Si Ferrer nakabawos bisan naunhan sa suspek nga si Christopher Reponte nga miresulta usab sa pagkamatay sa naulahi.
Ang nahisgutang polis naa karon sa Chung Hua Hospital samtang kagahapon gihatagan og Medalya ng Sugatang Magiting ni Deputy Director for Administration sa PRO-7, Chief Supt. Federico Terte ang maong polis isip pagpasidungog sa sakripisyong iyang gihimo.
Matod sa mayor nga usa ka gatos ka libo ka pesos ang iyang ihatag nga cash reward ngadto kang PO3 Ferrer.
Kini mas taas ug doble gani sa P50 mil nga unang gisaad sa mayor nga ganting salapi ngadto sa mga polis nga makapatay og kriminal dinhi sa dakbayan.
Gipasabot ni Osmeña nga ang dugang P50 mil nga ihatag ngadto sa polis pahalipay kini tungod sa kaisog niining gipakita pagbawos ug pagpatay sa suspetsado.
“He can get P100 thousand from the City, P50 thousand for gallantry and another P50 thousand for the killing the guy such I promised,” sumala ni Osmeña.
Una nang nanawagan ang asawa ni PO3 Ferrer nga si Jessyl ngadto sa kagamhanan sa dakbayan nga sila tabangan sa balayranan sa tambalanan.
Gipasalig na hinoon ni Cebu City Police Office Director Sr. Supt. Patrocinio Comendador nga dili nila pasagdan ang maong polis.