Misurender kagahapon sa hapon ang hepe sa barangay tanod sa Ermita human kini kumbinsira sa ilang barangay kapitan nga si Felicisimo Rupinta pagtahan sa iyang kaugalingon diha sa buhatan sa Homicide Section sa Cebu City Police Office may labot sa kamatayon sa usa ka 14-anyos nga bata sa Carbon market niadtong Domingo sa kaadlawon.
Ang mitahan mao si Beltran Bosque, kinsa positibong gitumbok ni Ananias Anter, amahan sa napatay nga 14-anyos nga bata nga mao ang tanod nga may gikuptang pusil nga miduol kaniya pipila lang ka segundos human mahagba iyang anak.
Ang anak ni Anter nga si Junard naigo diha sa walang bahin sa dughan tumong sa kasing-kasing wala na matabang sa mga mananambal sa Cebu City Medical Center ug namatay.
Ang insidente nahitabo human sa ginukdanay sa mga tanod ug gidudahang tulisan nga si Wilson Bagol, 27, kinsa gialarmang nanulis sa usa ka tindahan ug may dalang pinote uban sa duha pa ka mga kauban.
Sukwahi sa report sa taga Ermita, diha sa homicide section gikatahong nagmaoy niadtong tungura si Bagol maong gialarma ug gigukod hangtud nga gipusil sa giingong mga tanod apan napagan si Junard kinsa niadtong tungura nagpaabot nga makarga ang ilang hinakot nga utanon uban sa iyang amahan.
Sayo pa kagahapon nagdala si Rupinta sa usa ka anti-crime volunteer nga si Alex Dimaalip,24, nga usa ka Maranaw kinsa miangkong diha siya atol sa paggukod sa grupo ni Bagol.
Apan si Dimaalip mihimakak nga nagdala siya og armas sanglit igo ra siyang migukod sa mimugna og kagubot ug pag-abot niya nahagba na si Bagol ug si Anter.
Sa pagdala ni Rupinta kang Dimaalip gituuhan nga mao kini ang iyang gitumbok nga suspek sa pagpataka og pamusil apan ang amahan sa bata wala makumbinsir hangtud di mapakita ang tulo ka tawong matud pa niya miduol kaniya dihang nagsapupo siya sa iyang himatyunong anak.
Usa kanila mao si Bosque nga iyang positibong gitumbok nga mao ang nagbitbit og armas ug nagtion-tion sa mga tawo human mahagba ang iyang anak, si Bosque susama og gidak-on ug gitas-on ingon man may pagkaanggid-anggid sa dagway ni Alvin Mahilum nga maoy unang gitudlo ni Ananias diha sa barangay hall niadtong Domingo apan iya ra usab gibakwi human makasab-i sa kapitan tungod sa pagpataka og panudlo og tawo.
Si Ananias kagahapon nagkanayon nga dili siya mosugot nga bayran lang ang kinabuhi sa iyang anak ug buot gyud niyang mabilanggo kung kinsa nakapatay sa bata.
Wala hinuon gitumbok direkta ni Ananias nga si Bosque maoy nipusil sa iyang anak apan gumikan kay si Bosque ug mga kaubanang tanod man maoy daling niduol human sa buto-buto ug may dalang armas hinungdan nga sila maoy gisuspetsahan.
Si Bosque sa iyang bahin mihimakak nga maoy nakapusil sa bata ug igo rang miresponde diha sa crime scene, mihimakak usab kining duna siya’y armas niadtong tungura.
Miangkon siyang may tawong nagpakitabang kaniya kay ang anak niini samaron maong nangita siya dayon og multicab nga makargahan sa bata pangadto sa tambalanan.
Si Bosque gipailawom sa paraffin test kagahapon sa hapon, samtang si Rupinta midumili na paghatag og dugang pamahayag kabahin sa pagpatahan niya kang Bosque.
Si Sr. Insp. Mario Monilar, hepe sa Homicide Section nagkanayon nga kasong homicide ang ilang isang-at batok kang Bosque base usab sa pagtumbok kaniya sa amahan ug ang pag-angkon ni Bosque nga apil siya sa mga migukod sa grupo ni Bagol.