Tag-iya sa shipping company kansang tugboat mibangga sa first Mactan-Mandaue Bridge gikatakdang pangayoan og pormal nga apelar sa giingong tinguha niining pakubsan ang multang P500,000 sa bridge authority tungod sa pagdasmag sa ilang tugboat sa maong tulay.
Sa labing ulahing panagtagbo sa Mactan Cebu Bridge Management Board (MCBMB), si Governor Gwendolyn Garcia ug mga sakop sa board nagkasabot nga imbitahon ang usa sa mga tag-iya sa Asian Shipping Corporation nga si Nick Pepito aron tukion ang hangyo niini.
Matud pang Garcia si Pepito nakadungog kining nagplanong mohangyo ang shipping company nga pakubsan ang multa apan giklaro sa gobernador nga dili siya maoy angayang modesisyon niini sanglit duna may board.
“I want this clarified (pinaagi sa pormal nga suwat). Lisud na,” sumala pang Garcia.
“It must be transparent, through an official letter to the committee and not just to one person,” dugang pa niini.
Base sa report sa Maritime Police Office ang Asian Shipping Corp. barge L. Acuario 2, nga giguyod niadtong Abril 6 nidasmag sa bisinidad sa Pier 8 sa may karaang taytayan duol sa Lapulapu City.
Ang maong barge padulong niadtong tungura sa Manila ug gawas pa sa naigong taytayan nadasmagan usab niini ang usa ka bollard sa laing shipping company diha sa dapit samtang nagmaniobra ilawom sa maong taytayan.
Hinuon mipagawas og pamahayag ang Department of Public Works and Highways (DPWH) human ma-eksamin ang tulay nga wala maapektahi ang integridad sa maong tulay ug di kini delikado.
Sumala pa sa shipping lines ang sulog sa tubig diha sa Mactan Channel maoy nakaingon maong nibabag ang ilang barge.