Naglibog na karon ang pipila ka sakop sa konseho sa siyudad sa Sugbu kanus-a gyud mahuman ang katukoran sa kontrobersiyal nga Banilad flyover.
Kini bisan pa man kung ang katukuran sa nahisgutang proyekto gitagalan og napulo ka buwan o hangtud sa buwan sa Nobiyembre ang pagtrabaho.
Apan kung ang kontraktor (WTG Construction) maoy pasultihon, on-schedule ang ilang trabaho ug mahuman ang proyekto sa hinapos nga bahin sunod buwan.
Samtang lahi usab ang pagbana-bana sa Department of Public Works and Highways (DPWH-7) labot sa pagtrabaho sa nahisgutang flyover.
Sa gipadala niining suwat sa City Council, giingong on-schedule ang konstruksiyon sa proyekto ug kini mahuman sa buwan sa Nobiyembre.
Duna hinooy pipila ka mga konsehal sa amihanang distrito ang nagtuo nga lisod gyud humanon sa kontraktor ang flyover sa sunod buwan.
Usa na niini mao si Konsehal Sylvan Jakosalem nga maoy chairman sa Committee on Transportation sa City Council ug sakop usab sa Citom board.
Dili hinoon igsapayan sa konsehal kung mahuman sunod buwan o unya pa sa Nobiyembre magamit ang flyover, kung dili lang masakripisyo ang publiko.
“I don’t really care kanus-a mahuman basta dili paabton sa Disyembre unya dili sab masirad-an totally ang dalan nga masakripisyo na hinoon ang katawhan,” sumala ni Jakosalem.
“Kay mao may giingon sa kontraktor nga kung ganahan ta mahuman og dali, ilang sirad-an ang dalan, dili man na mahimo kay wala man tay laing kaagian,” dugang pamahayag sa konsehal.
Sa pikas bahin, niingon si Jakosalem nga dugang traffic personnel ang ilang ibutang sa Banilad-Talamban area sunod semana partikular na diha sa dapit diin gitukod ang flyover.
Kini tungod sa gipaabot nga panaghuot unya sa mga sakyanan diha sa maong dapit subay usab sa pagsugod na sa klase karong Hunyo 10.
“We will have to deal with the traffic na lang, anyway naa man tay bag-ong 80 ka buok nga traffic enforcer by June 15.