Usa sa tulo ka mga polis sa Aloguinsan nga nagpatrolya sakay sa motorsiklo ang nadisgrasya human nakaligis og iro niadtong Huwebes sa kaadlawon diha sa barangay Bonbon sa maong lungsod.
Si PO1 Sany Solomon nakaangkon og fracture sa walang paa gumikan sa pagkalamba sa sementadong dalan.
Si PO3 Juanito Pilapil nga nahinabi sa Banat News mitug-an nga gimanduan sa ilang hepe nga si Insp. Rovic Villarin sila Solomon, PO3 Jehaziel Huyo-a ug PO2 Marlon Pepito pag-roving sa barangay Bonbon tungod sa grabeng kinawatay og mga manok igtatari sa maong lugar.
Ang biktima maoy nagmaneho sa motorsiklo samtang angkas sila si PO3 Huyo-a ug PO2 Pepito apan sa dihang naabot na sila sa nahisgutang barangay kalit nga may milabang nga iro ug naligsan kini hinungdan nga nangalamba ang mga polis.
Si Solomon nga maoy nagrabihan gidali pagdala sa Vicente Sotto Memorial Medical Center samtang luwas ang duha.
Samtang sa laing bahin naguba ang tapalodo sa patrol blue jeep sa Carmen Police Station human nabangga sa kahoy diha sa Poblacion Carmen human mitubag og alarma.
Si PO3 Alex Perez maoy nagmaneho sa maong patrol car ug mitubag sa alarma sa pagpanunggab diha sa maong dapit apan pag-abot sa sitio Bukingking sa Poblacion kalit lang nisarasay ang patrol car tungod sa kadangog sa karsada hinungdan nawad-an og control si Perez ug misampak sa punoan sa kahoy.