Mikabat og P13 milyones ang kinatibuk-ang kantidad sa mga alahas nga nadala sa walo ka mga tulisan nga miigo sa duha ka pawnshops diha sa dalan Magallanes sumala pa sa giluwatang affidavit sa mga tag-iya niini.
Si Sr. Insp. Michael Anthony Bastes hepe sa Theft and Robbery Section mitug-an sa Banat News nga ang magsuong tag-iya sa Oro Sugbu ug Agencia Ann nga sila si Ernesto Siguan ug Robert Siguan mideklarar sa maong kantidad human matapos ang ilang imbentaryo.
Matud pang Bastes ang tag-iya sa Oro Sugbu nga managtiayong Ernesto ug Josephine Siguan mideklarar nga nadagit sa mga tulisan ang 9,370 ka buok nga mga alahas nga nibalor tanan og P11, 712,500 milyones.
Samtang ang sa Agencia Ann ang tag-iya niini nga magtiayong Robert ug Nena Siguan wala na ibutang kung pila ka buok ang alahas nga nadala apan kini nagkantidad og P1.3 milyones.
Ang mga alahas gikatahong pulos mga Chinese gold maong mahal kini.
Samtang nasubay na usab kung kang kinsa ang Toyota Lite Ace van nga may plakang GDJ-400 nga gigamit sa mga suspek ug giabandona diha sa gamay'ng eskina sa dalan Tres de Abril sa barangay Pahina-San Nicolas.
Ang maong sakyanan gikatahong gipanag-iya sa usa ka residente sa dalan Simuon Street sa barangay Pari-an apan nasuta sa kapolisan nga iya na kining gi-trade-in sa usa ka display center diha sa dakbayan sa Mandaue.
Dihang giadto sa kapolisan ang maong display center nga Gateway Motors Cebu Inc. sa dalan Cortes Avenue sa dakbayan sa Mandaue nasuta nga usa ka Irwin Ignacio nga taga Dumaguete City ang nipalit niini ug napalit kini niadtong adlaw'ng Biyernes sa kantidad nga P126,000.
Matud pang Bastes P130,000 unta ang presyo niini apan gumikan kay nagdali-dali ang nipalit niini sila nalang ang moparehistro niini maong naka-discount ang nipalit.
Kagahapon napasaka na ang kasong Robbery with Homicide ug Physical Injury batok sa mga nadakpang suspek nga sila si Emmanuel Alimbuyong Caraballe ug Baby Toring.