Naligsan patay ang usa ka hubog samtang naglakaw nga nagpatunga sa dalan sa sitio Lourdes barangay Yati lungsod sa Liloan niadtong Domingo sa alas 12:20 sa kaadlawon.
Ang biktima nga sa paghimo ning balita wala pa maila ang pangalan sa kapulisan nagsul-ob og maong nga karsones, t-shirt nga kolor blue ug rubber shoes nga kolor brown.
Matod ni PO2 Routchil Jugalbot sa Liloan Police dihang nahinabi sa Banat News dunay mibadlong sa biktima nga mga nag-inom nga estambay sa maong lugar nga magpadaplin sa dalan.
Kini tungod giingong hubog na kaayo ug nagsamparay na og lakaw paingon sa amihanan apan wala gyud kini mopatuo hinungdan nga nabanggaan kini sa usa ka multicab nga paingon sa lungsod sa Compostela nga nagsunod sa biktima.
Gituohan sa kapulisan nga nabunal ang ulo niini sa kalsada ug ang estambay nga mibadlong kaniya mao nay mitawag og ambulansya sa Liloan ug gihatod sa Cortes Hospital sa dakbayan sa Mandaue ang biktima apan gideklarar nga dead on arrival (DOA).
Samtang matud sa mga nakasaksi daling mipasutoy ang multicab palayo sa lugar.