Edipisyong nasunog kagahapon sa kaadlawon katulo nisilaob diha sa dalan M.C. Briones sa barangay Ermita ug milamoy sa usa sa mga karaang building sa nahisgutang dapit nga giokupar og tulo ka mga tindahan kagahapon sa kaadlawon.
Ang naugdaw mao ang edipisyong gipanag-iya sa banay'ng Sarmiento nga matud pang SFO2 Felix Romero postwar era pa natukod.
Ang maong building giokupar sa mga tindahang Jim’s Enterprises; Celia’s Store ug Emy Store nga naninda og nagkalain-laing produkto ug mga aluminum products.
Ang alarma nagsugod alas 2:10 sa buntag ug nakontrolar sulod sa 35 minutos apan kagahapon sa udto subli kining nisilaob hinungdan nga nibalik ang kabomberuhan sa dapit aron kini kumbatihon.
Human sa 30 minutos nibiya na ang grupo ni Romero apan nianang pagkaalas 3 sa hapon subli na usab nga nisilaob ang dapit maong nibalik na usab ang kabomberuhan ug gikumbati ang sunog.
Matud pang Romero tungod sa kabalakang sila mahan-ukan sa mga sementadong bungbong sa maong building wala sila mosungason og dasmag sa dapit ug igo ra nila kining gibombahan og daghang tubig.
Nianang pagkakaadlawon naisa ngadto sa third alarm ang maong alarma apan walay naangol sa maong insidente sanglit walay mga tawong gitugutang diha matulog sa sulod.
Matud pang Romero ang kalayo diha magsugod sa ikaduhang andana sa Jim’s Enterprises apan pipila ka minutos una pa magsugod ang kalayo ang mga tawo diha sa palibot nangalisang dihang kalit nga nagpiti-piti ang mga kable sa kuryente gikan sa poste ug nilatay ang kalayo padulong sa sulod sa Jim’s.