Si Talisay City Administrator Ritchel Bacaltos mopahigayon og pakisusi kabahin sa taho nga dunay mga kawani sa city hall kinsa giingong mogamit og ginadiling drugas.
Matud sa city administrator nga giawhag niya ang publiko nga mopadala og pormal nga impormasyon kabahin sa mga kawani kinsa giingong mga adik bisan og ipaagi lang og “anonymous letter” aron mahimoan dayon kini og aksiyon.
Sa pakighinabi niini sa Banat News kagahapon sa hapon, ang city administrator nagkanayon nga ipatawag niya ang hepe sa Human Resource Department nga si Emely Cabrera aron mapahibawo ug mopatawag usab siya og tigum sa mga department heads kabahin sa maong problema.
Gitataw usab niini nga wala sila mopahigayon og drug test sa mga “job order” tungod kay mubong panahon lang kining tugotan nga makaserbisyo kinsa ang uban kanila ang moserbisyo lang sulod sa 15 ka adlaw ug ang labing taas lima ka buwan apan adunay uban ang sigeng maka-renew sa ilang trabaho.
Gibutyag usab ni Bacaltos nga wala usab sila mopahigayon og drug test sa mga regular nga kawani tungod kay karon lang siya makadawat sa maong taho.