Gipasidan-an sa Departamento sa Edukasyon ang iyang mga opisyal sa dili pagsingil sa mga bayranan sa mga estudyante nga magpalista aron makatungha.
Ang pasidaan giluwatan ni Regional Director Carolino Mordeno sa DepEd-7 samtang nagkaduol na ang ting-able sa klase.
Matud pa ni Mordeno nga kalikayan ang panaglalis sa mga magtutudlo ug sa mga ginikanan sa estudyante kung ang nahauna motuman lamang sa lagda nga gipatuman sa gobyerno.
Kini pinasubay sa DepEd Order No. l9 nga nagbuot nga kadtong mga preschooler ug mga motungha sa grade 1 ngadto sa grade 4, dili paninglan og bayad sa ilang pagpalista ug sa tibook tuig nilang pagtungha, samtang ang grade 5 ug 6 dili usab paninglan sa adlaw sa ilang pagpalista ug sa unang buwan sa klase.
Matud pa ni Mordeno nga gawas lamang kun boluntaryo ang pagbayad sa estudyante o ginikanan sa adlaw sa ilang pagpa-enrol, anha pa modawat og bayad ang mga opisyal sa tulunghaan.
Ang kasagarang bayranan sa mga estudyante sa eskuylahan sa gobyerno mao ang Boy ug Girl Scout of the Philippines, Philippine National Red Cross, Parents Teachers Community Association ug Anti-TB fund campaign.