Gipahinumduman karon ni Konsehal Edgardo Labella ang Cebu City Schools Division nga tumanon ang DepEd Order Number 19 series of 2008 alang sa enrollment.
Lakip sa gipahinumdum sa konsehal ngadto sa mga magtutudlo sa dakbayan mao ang iyang gipangamahanan nga ordinansa, ang City Ordinance Number 1813.
Ang DepEd Order Number 19 naglatid nga walay balayranan nga kolektahon gikan sa mga ginikanan nga mopa-enroll sa ilang mga anak alang sa 2008-2009 nga tuig tingtungha.
Partikular na niini sa mga tinun-an nga mo-enroll sa pre-school hangtod na sa grade 4 sa bisan asa nga adlaw sa enrollment period o sa kinatibuk-ang school year.
Bisan kun gitugot sa maong kamanduan ang pagkolekta og kontribusyon sa mga tinun-an sa grade 5 ug grade 6, apan kinahanglang boluntaryo lang usab
Kini sama sa Boy Scout of the Philippines (BSP), Girl Scout of the Philippines (BSP), Red Cross, Anti-TB, Parents, Teachers and Community Association (PTCA) ug uban pa.
Samtang ang section 2 sa City Ordinance 1813 nagdili usab sa mga school administrator, supervisor, principal ug mga magtutudlo pagkolekta ug bisan unsang kontribusyon sa mga tinun-an.
Ang mga school authorities sa pampublikong mga tunghaan sa dakbayan nga makalapas sa nahisgutang ordinansa mahimong mamultahan ug mabilanggo.
Mipahinumdum si Labella niini ngadto sa mga tinugyanan sa mga publikong tunghaan sa siyudad sa tuyo nga mapatuman sa hingpit ang polisiya sa estado.
Kini mao ang paghatag og libreng edukasyon sa mga tinun-an ilabi na sa elementary ug high school level nga nalatid usab sa batakang balaud.
Nagkanayon ang konsehal nga kun mapatuman ang kamanduan sa DepEd ingon ang ordinansa sa dakbayan, daghan na unya ang magpa-enroll nga kabataan sa dakbayan.
Ang awhag ug pahinumdum ni Labella sa Cebu City Schools Division iyang ipaagi sa usa ka resolusyon nga ipalabang atol sa sesyon sa City Council karong Miyerkules.