Nagubot og makadiyot ang demolisyon sa tulo ka panimalay nga nahimutang sa luna sa usa ka negosyante diha sa barangay Binggay sa lungsod sa Borbon human usa sa mga anak sa tagbalay ang gikatahong mihamag sa mga polis.
Gikinahanglan pa mopabuto og warning shot sa mga polis aron abugon ang mga tawong gikatahong mihana na og dasmag sa mga polis nga mikuyog sa sheriff sa korte nga si Eva Bentic aron ipatuman ang kamandoan ni Judge Alfredo dela Victoria sa RTC –Bogo Branch 61 nga penetsahan og Abril 29.
Wala hinuon dakpa sa mga polis si Junly Branzuela, anak sa usa sa mga tag-iya sa balay nga si Gumercindo Branzuela kini human mapugngi sa mga tawo dihang nakapasalba na ang mga polis.
Matud pang Insp. Camilo Gonzaga, hepe sa Borbon police station nga gihinabi sa Banat News tulo ka mga balay ang ilang gidemolis kagahapon nga gipanag-iya ni Branzuela; kabanay niining si Ramon Branzuela ug Reha Blanco.
“Duna ray gamay'ng komosyon kay midasmag man ni si Junly sa mga nag-demolish mangulata kaha to siya maong nangatras ang mga nag-demolish, duna pay laing mga tawo didto nga kahamagon sad mao to nga nag-warning shot nalang ning akong mga tawo,” asoy pang Gonzaga kinsa mao pay paglingkod isip hepe sa maong police station.
Ang maong molupyo dugay nga gipapahawa sa tag-iya sa luna nga si Michelle Lhuillier ug gipasaligan pa og tabang nga ilang kabalhinan og posibleng trabaho apan gikatahong nagmagahi ang mga okupante. Ang maong luna nabutang diha sa coastal barangay.
Apan gumikan sa ilang wala pagkasinabtanay sa tag-iya gipasakaan sila og kiha niini ngadto sa Municipal Trial Court diin napilde ang mga okupante hinungdan sa ilang pag-apelar ngadto sa Regional Trial Court diin sila gikatahong subling napilde ug giisyuhan og writ of demolition.