Duha ka mga kargador sa Pasil Fish Port ang nalandig sa Cebu City Medical Center (CCMC) human gipusil sa usa ka notadong manghingiay mga alas 3:05 sa hapon niadtong Lunes diha sa may Pasil Fish Port, sa Gen. Gines St., barangay Suba ning dakbayan.
Ang mga biktima giila sa kapulisan nga sila si Pablo Tiro, 30, taga Belgium St., Pasil ang nakaangkon og samad pinusilan sa iyang luyong bahin sa lawas ug nilapos ang bala sa tiyan samtang ang kauban niini nga si Fyron Kong, 23, ang nakaangkon usab og samad pinusilan sa tuo nga bahin sa iyang lubot.
Ang namusil sa mga biktima giila nga si Julius Mahusay Igot taga sitio Buwaran, barangay Sawang Calero ug notadong badlungon sa maong lugar.
Sa imbestigasyon nila ni SPO1 Rogelio Nedamo sa Homicide Section sa Cebu City Police Office ang biktima nga si Tiro mitug-an nga naglingkod siya sa nahisgutang lugar uban ni Kong niadtong tungora. Dihang naabot ang suspetsado ug miduol kaniya nga nanghingi og kwarta apan iyang gibalibaran apan gikasuko kini sa suspek maong ila nalang unta kining biyaan.
Apan ang suspetsado kalit lang nibunot sa gidala niining pistola ug namusil ngadto kanila dayon pahilayo sa nahisgutang dapit.
Hinuon ang mga biktima luwas na karon sa makuyaw nga kahimtang human nadali sa pagdala sa CCMC.