Patay dihadiha dayon ang usa ka 13 anyos nga batang babaye human kini natagakan sa dakong bato samtang nangubkob og anapog sa ilang gi-quarry diha sa barangay San Agustin, lungsod sa Madredijos, isla sa Bantayan Island pasado alas 9 kagahapon sa buntag.
Napaod ang ulo sa laing bato ug nilugwa ang utok ni Roselyn Molle, 13, mag-first year high school karong abli sa klase sa bulan sa Hunyo ug kasamtangan nagpuyo sa balay sa iyang apohang babaye sa nahisgutang barangay tungod kay ang mga ginikanan ania dinhi sa dakbayan sa Sugbo nagtrabaho.
Matud ni SPO1 Manolo Jo, officer in charge sa Madridejos Police Station nga nahinabi sa Banat News ug subay sa ilang imbestigasyon sa nahitaboan ang maong biktima dunay duha ka laing batang minor de edad nga iyang mga ig-agaw nangubkob og anapog aron ibaligya.
Giingon ang duha niini ka mga ig-agaw mibiya na sa dapit nga ilang gi-quarry ug nag-inusara na lang ang biktima sa pagpanguha og anapog.
Apan wala siya makabantay sa dihang kalit lang midahili ug miligid ang dakong bato sa ibabaw’ng bahin ug didto mitugpa sa iyang ulo nga maoy nakaingon sa hinanali niyang kamatayon.
“Pag-abot namo didto among naabtan ang daghang mga bata nga kauban pud nga nangubkob og anapog,” dugang butyag ni SPO1 Jo.
Giklaro hinuon ni Jo ang gihimong quarry sa mga bata ubos sa pagtugot sa tag-iya sa yuta ug wala gamiti og heavy equipment kun dili mano-mano lamang gamit ang pala ug piko.