Nadakpan sa kapolisan ang usa ka ginang nga naghupot og duha ka paketeng shabu samtang niresponde ang kapulisan og armed person alarm didto sa barangay Pooc siyudad sa Toledo niadtong Huwebes sa alas 3:00 sa hapon.
Ang gidakop sa kapulisan ug nakuhaan og duha ka pakete sa gituohang shabu giila nga si Lilibeth Lapaz Respondo, 37, molupyo sa nahisgutang lugar.
Sila si SPO1 Barcelo Comita ug PO3 Gerardo Taboada mitubag og alarma may labot sa usa ka lalaking armado sa nahisgutang lugar apan nakaipsot na kini.
Sa paghiabot sa kapolisan sa lugar nakasibat na ang gialarma nga suspek ug sa tanto nga pagsusisusi sa maong mga polis sa maong lugar nadiskita-an nila si Respondo nga nagdala og shabu.
Si Respondo gibalhug na karun sa detention cell sa Toledo Police human pormal na kining gipasakaan og kaso sa korte nga paghupot og gidiling drugas.