Dismayado ang mga rice retailers sa dakbayan sa Sugbu sa plano karon ni Presidente Gloria Macapagal Arroyo pagkuha og balik sa mga NFA rice gikan sa kamerkaduhan.
Tumong sa presidente sa nahisgutang lakang nga masiguro ang pag-abot sa NFA rice ngadto sa mga kabus nga mga pamilya sa matag komunidad.
Kini human masakpi ang ubang NFA officials nga giingong nakigkunsabo sa mga rice traders pag-divert sa bugas nga gibaligya sa gobiyerno.
Matud sa bise presidente sa Grains Retailers Confederation of the Philippines (Grecon) nga si Erwin Goc-ong nga ilang gikasubo ang pamahayag sa presidente.
Kini tungod kay giingong matinud-anon ang ilang pagbaligya sa NFA rice gawas nga kini lisod i-divert mugna sa hinugtanay nga monitoring sa NFA.
“Unsaon man namo pag-divert sa stocks nga gikan sa bodega sa NFA duna may escort, unya dili man mi makabaligya og walay inspector, gawas ana, ang NFA muhimo pod og pre ug post inventory, so, amo gyod nga gikaguol nang plano sa presidente, siguro kung ipatuman na, muapilar gyud mi ana,”sumala ni Goc-ong.
Ang pamahayag ni Goc-ong gidasonan usab sa presidente sa Rice and Corn Retailers Association (RCRA) sa habagatang distrito sa siyudad nga si Cenon Bacus.
Matud ni Bacus nga aktibo karon ang mga inspektor sa NFA sa pagmonitor sa ilang gibaligya nga bugas ug dili gyud makalusot kun dunay mohimo og ilegal.
Ang matag lokal nga kagamhanan na, ingon man ang simbahan maoy tahasan sa pagpang-apod-apod sa NFA rice kun mahinayon ang plano sa presidente.
Apan napanglantawan ni Bacus nga mosamot unya ang kagubot sa pagpamaligya og bugas kun kini itugyan ngadto sa lokal nga kagamhanan.
“Kung iagi nila na sa LGU, kay ako konsehal man sab sa among barangay, mas labaw pa unya nga magproblema kay ang barangay walay kalibutan sa pamaagi,” nagkanayon si Bacus.
Midugang si Bacus nga sa dili pa ipatuman ang plano sa kagamhanan, gikinahanglan nga kini mutan-aw una sa sitwasyon sa kamerkaduhan.
Ang gipasabot sa konsehal mao ang taas nga linya sa mga tawo nga magbagolbol sa ilang pagpalit og NFA rice tungod sa limitadong suplay niini.
Subling gipadayag sa mga rice traders nga usa lang ang solusyon sa maong problema, ug kini mao ang pagpabaha og NFA rice sa kamerkaduhan.