Mayor sa Ronda nga si Mayor Esteban Sia subling nangayo og dugang polis ug pagbutang og police outpost sa duha ka mga bukirong barangay sa iyang lungsod tungod sa giingong mga nagbahas-bahas nga mga armadong tawo nga nagtisok og kasamok sa iyang lungsod.
Nibahad si Sia nga adto idangop kang Presidente Gloria Arroyo ang problema niini kung di gihapon kini atimanon sa kapolisan sa probinsya.
Si Sia sa pakighinabi sa Banat News sa telepono niadtong Biyernes sa gabii mitug-an nga dunay mga armadong tawo nga magpunay og bahas-bahas sa kabukiran ug mangawat og hayupan sa iyang ginsakupan apan gumikan sa kahadlok wala nalang mangreklamo.
Niadtong Miyerkules sa gabii, kalit nga girakrakan ang balay ni Sia sa tulo ka armadong tawo sakay sa kolor yellow nga motorsiklong walay plaka bisan dunay upat ka polis nga diha sa ilang atbang niadtong tungura.
Hinuon walay naigo sa maong pagpamusil apan nakapabalaka kini sa mayor gumikan kay mao usab kini ang grupong gidudahan niyang maoy responsable sa mga pagpatay diha sa iyang lungsod.
Matud pang Sia nga armado og Armalite, Garand ug Carbine ang maong mga armadong lalaki ug kini gituuhan niining gipunduhan og impluwensyadong tawo nga buot nga mopatay kaniya.
Nagtuo usab ang mayor nga may bulok politika ang maong pagpamusil ug binuhatan kini sa iyang mga kaatbang.
Si Sia daan nang nangayo og dugang polis kang Cebu Provincial Police Office director, Sr. Supt. Carmelo Valmoria aron butangan og police outpost ang duha ka bukirong barangay sa Malalay ug Kinasang-an nga giingong maoy patrolyahan sa mga armado.
Nagtuo si Sia nga pinaagi sa permanenteng pagbutang og police outpost dili na makabahas-bahas ang maong mga armado ug mahunong na usab ang pagpatay ug pagpangawat sa maong mga dapit.
Apan si Sr. Supt. Carmelo Valmoria subling mipasabot nga sa pagkakaron wala pay polis nga mahatag o mapadala ngadto sa maong lungsod gumikan kay kulang usab sila og mga tawo ug duna pay laing mga lungsod nga nagkulang usab og mga polis.
Atol sa pakighinabi sa DySS si Valmoria nagkanayon nga dili praktikal nga magbutang gyud og police outpost sa maong mga dapit tungod kay permanente na kini samtang ang giingong mga armadong tawo kanunay'ng naglihok kun “mobile.”
Hinuon gibutyag niyang duna nay mga pangalan ang maong mga tawo ug may mga kaso nang napasaka batok kanila apan wala pay warrant of arrest nga nigawas aron sila madakpan.
Sumala pa niini makadaghang higayon nang gisusi sa mga polis ang mga dapit nga gipunduhan sa grupo apan kanunay lang nga di sila maabtan sanglit magbalhin-balhin kini og dapit.