Arestado ang usa ka kagawad sa barangay sa usa sa mga lungsod sa Lanao del Sur atol sa buy-bust operation sa mga sakop sa Philippine Drug Enforcement Agency ug Regional Anti-Illegal Drug Task Force sa lungsod sa Consolacion.
Ang nadakpan giilang si Alden Abdul Hamad, 24, giingong kagawad sa barangay Lubac sa lungsod sa Tugaya, Lanao del Sur kinsa temporaryong nagpuyo sa barangay Pio Tabugon sa Consolacion.
Nadakpan usab ang drayber sa motorsiklong iyang gisakyan nga si Joseph Gaviola kinsa taga barangay Polpogan, Consolacion.
Ang mga sakop sa PDEA-7 ug RAIDSOTG pinanguluhan ni Insp. Kenneth Paul Albutra milusad sa maong operasyon human makakuha og impormasyon gikan sa laing kababayan ni Hamad nga ila usab nadakpan niadtong Abril 2 sa susamang kaso nga si Candaruan Kamad.
Ang pagsikop nahitabo diha mismo sa Cansaga human magkasabot nga mopalit ang mga awtoridad og balig P35,000 nga balor sa shabu gikan kaniya.
Apan human matunol ang gidiling drugas ug ang marked money nga P500 nga gitabon sa mga pinutol nga “budol money” daling giaresto si Hamad.
Ang suspek dihang gisuwayan og kuha sa mga sakop sa media og pamahayag midumili sa paghatag sa iyang habig ug nagpunay lang kini og estorya sa ilang pinulungan.
Samtang si Gaviola midumili usab pagtingog kabahin sa mga alegasyon batok kanila. Ang duha gikatakdang pasakaan og kasong pagbaligya og illegal nga drugas sa RA 9165 ug gitanggong sa karsel sa PDEA-7.