Pabor si Cebu City Councilor Gerardo “Gerry” Carillo nga ipadayon sa Department of Education (Deped) ang plano niini pagsukip sa sex education sa high school.
Ang konsehal nga maoy chairman sa Committee on Education sa City Council niingon nga walay dautan sa maong lakang tungod kay ang mga teenager nga anaa sa high school angayan nang matudluan ug magiyahan labot sa maong pagtulun-an.
Kini tungod kay sa nahisgutang pangedaron giingong anaa na ang kakuryuso nga posibleng maghatod kanila sa dili maayong epekto.
Sa pikas bahin, ang country director sa Human Life International (HLI) nga si Doctor Rene Josef Bullecer niingon nga delikado ang modules nga gamiton alang sa sex education.
Kini tungod kay ang nahisgutang reading materials giingong maghisgot sa pre-marital sex, unwanted pregnancy ingon man sa abortion.
Gipadayag ni Bullecer nga ang maong lakang malampuson nilang gibabagan kaniadto pinaagi sa paghangyo kang Presidente Gloria Macapagal Arroyo.