Mga polis nga gidudahang tiggamitan sa ilegal nga drogas pulos pa nag-ranggo og Police Officer One ug parehong nadestino sa miscellaneous teams sa managlahing police stations sa dakbayan sa Sugbu.
Kini maoy gibutyag ni Sr. Insp. George Ylanan, hepe sa Criminal Investigation and Intelligence Branch sa mga tigbalita kagahapon apan midumili pa una kini mohingalan sa duha.
Si Ylanan mitug-an nga duna nay gihimong imbestigasyon sa duha kabahin sa ilang kalihukan ug si kinsa ang posibleng lain pang mga kaubanan nila sa maong binuhatan.
Matud pang Ylanan inig gawas na sa confirmatory test gikan sa specimen sa mga ihi sa maong mga polis ug makumpirmar gyud nga nigamit sila og illegal nga drugas ila kining irekomendar nga ipailawom sa summary hearing ngadto sa Police Regional Office-7.
Dugang pang Ylanan nga posibleng makasuhan pa ang maong mga polis og kasong paglapas sa RA 9165 tungod sa paggamit og illegal nga drugas gawas pa sa kasong administratiba.
Si Sr. Supt. Patrocinio Comendador director sa CCPO daan nang mibahad nga kung dunay polis nga makumpirmar nga drug user iya gyud kining ipataktak sa serbisyo ug wala nay rehabilitasyon nga angayang himuon kanila.
Ang surpresang drug test gihimo ni Comendador human sa pakigtagbo sa 90 ka mga sakop sa miscellaneous teams sa onse ka police stations ug special units.