Tulo ka mga lalaking giingong mga miyembro sa “Laglag Barya” ang gipangdakop kagahapon sa kapolisan human sila mataymingi sa mga polis ug sa mga Barangay Intelligence Network diha sulod sa usa ka jeepney atubangan mismo sa Cebu City Police Office kagahapon sa buntag.
Ang gipangdakop giilang sila si Greg Ligaray, 33, taga barangay Jagobiao dakbayan sa Mandaue; Michael Caballes, 34, taga Poblacion Minglanilla ug silingan niining si Rodulfo Panugan, 28.
Ang tulo kasamtangang nagsakay og jeepney nga gikan nagbiyahean sa barangay Lahug dihang nasigpatan sa mga sakop sa BIN nga naa sa atbang sa maong kampo.
Ang tulo dugay nang gipanid-an ug nailhan sa grupo nila ni Sr. Insp. Michael Anthony Bastes, hepe sa Theft and Robbery Section tungod sa pagpamiktima og pasahero diha sa mga pasaheroang sakyanan.
Kagahapon gipresentar ang tulo ngadto kang Sr. Supt. Patrocinio Comendador ang director sa CCPO ug pulos miangkon atubangan sa mga sakop sa media sa ilang modus operandi.
Si Ligaray kinsa dunay usa ka anak, mitug-an sa mga tigbalita nga mangita sila og paaging mabalhin ang atensyon sa ilang biktimahon sa ubang butang sama sa pagtagak og sinsilyo ug kung motabang kini og punit sa salog laing kauban nila ang mokuot sa butang nga ilang tuyo.
Nagkanayon ang tulo nga bag-uhay pa sila sa maong panginabuhian ug mihimakak nga nalambigit sa ubang matang sa modus operandi gawas sa “Laglag Barya” dugang pa nila nga dili sad apil sa ilang plano nga pasakitan ang ilang biktima kun sila mabantayan kundili moikyas nalang sila dayon.
Si Bastes mitug-an nga pito ka mga miyembro sa grupo ni Ligaray ang dugay na nilang gipangita ug gimonitor ang mga lihok ug kagahapon nabantayan sila sa mga BIN. Kasong bagransya lang maoy bugtong mapasaka sa kapolisan nga kaso batok sa tulo tungod kay walay nakuhang ebidensya ug wala pay nabiktima ang tulo apan pulos wala makapakita og mga identification ug lig-ong rason sa ilang paglibud-suroy.