Nakaangkon og kadaut ang walang kamot sa usa ka batan-on nga nagpalansang sa krus niadtong miaging Biyernes Santo.
Ang 19 anyos nga si Mark Escuyos nga molupyo sa barangay Guadalupe sa siyudad sa Sugbu mao ang midala sa papel ni Hesus atol sa ika-11 ka higayon nga pagpahigayon sa Buhing Kalbaryo.
Nahimong kontrobersyal ang pagpalansang ni Escuyos sa krus tungod kay kini wala madapati og anesthesia hinungdan sa iyang pagpig-ot sa kasakit atol sa crucifixion.
Dali hinuong gitabang si Escuyos sa mga volunteer sa Emergency Rescue Unit Foundation (ERUF) sa dihang nahuman ang kinatibuk-ang programa.
Apan ang kapakyas sa pagdapat og anesthesia sa mga kamot ni Escuyos nakapadismaya og maayo sa director sa Buhing Kalbaryo nga si Al Evangelio. Gani miluwat og pamahayag ang director nga dili na modirihir sa sunod tuig nga pagpahigayon sa Buhing Kalbaryo tungod sa maong lapso.
Ang labing pait nga nasinati ni Escuyos mao ang giingong pagkasipyat sa naglansang sa mga kamot niini nga miresulta sa pagkaigo sa bukog sa iyang walang kamot.
Sa report sa DyHP-RMN CEBU “Birada” program nasayran nga gisemento gyud ang bukog sa walang kamot ni Escuyos nga naapektahan sa paglansang.
Padayon pa karon nga nagpaalim si Escuyos sa iyang kamot nga nakaangkon og kadaut, ug wala pa hisayri kun kini subli pa ba nga magpanlansang human sa iyang gidangatan.
Ang pagpalansang ni Escuyos maoy usa sa iyang mga paagi sa pagsakripisyo ug pasalamat ngadto sa labaw nga makagagahum.
Kini dihang siya giingong diriyot mamatay human usab aksidenteng nakuryentihan ug mipilit sa linya sa kuryente sulod sa pipila ka mga gutlo pipila ka tuig na ang nakalabay.
Ang pagpalansang sa krus ni Escuyos sa miaging Biyernes Santo mao na ang ikaduhang higayon human usab siya magpalansang sa krus sa miaging tuig.