Upat ka tawo ang naangol ug nabali-bali ang lain-laing bahin sa ilang kalawasan apil na niini ang usa ka polis sa nahitabong panagbangga sa ilang gisakyan nga motorsiklo didto sa kurbadahon nga dalan sa Sityo Tapon, barangay Tabunok, lungsod sa Tabuelan Cebu alas 8:20 sa milabay'ng gabii.
Ang mga naangol sa maong hitabo naila nga sila si SPO1 Raymund Jugan nadestino sa Tabuelan Police Station ingon man ang gikabangga niini nga habal-habal drayber nga si Jose Jack Botaya ug duha ka mga angkas niini nga sila si Jomar Sabite, 22, ulitawo taga Canjulao siyudad sa Lapulapu ug Imelda Jumao-as, 32, minyo, taga Oppra dinhi sa dakbayan sa Sugbo.
Gibutyag ni SPO1 Jugan atol sa imbestigasyon nga paingon siya sa police station niadtong tungora nga nag-asister sa iyang kaubang polis nga si P03 Oliver Legaspino nga midakop sa iyang silingan niadtong tungora nga si Gerardo Arnaiz.
Si Arnaiz gidala kini ni PO3 Legaspino sa presinto human kini manghagis ug nangita og away didto sa barangay Tabunok.
Si Arnaiz nag-angkas sa motorsiklo nga gimaneho ni P03 Legaspino niadtong higayona paingon sa presinto samtang si SPO1 Jugan maoy nagsunod kanila sakay sa iyang DT Yamaha.
Apan paghiabot niini sa kurbadahon nga dapit sa nahisgutang lugar wala kini makabantay sa laing motorsiklo nga gemaneho ni Botaya hinungdan nga nagkabangga gyud ang maong duha ka motorsiklo.
Ang mga sakay pulos naangkong bali-bali ug bun-og sa kalawasan.