Natagbaw si Cebu City Vice mayor Michael Rama sa gipakitang labok sa kapulisan sa dakbayan pagpatunhay sa kahusay ug kalinaw sa siyudad atol sa Huwebes ug Biyernes Santo.
Kini tungod sa giingong pagkamalinawon sa kinatibuk-ang dakbayan atol sa pag-obserbar ug pagbalaan sa mga Sugbuanon sa nahisgutang mga adlaw.
Wala usab makadawat og report si Rama gikan sa mga konsehal sa siyudad nga dunay police station nga nilugak sa ilang siguridad.
Ang mga konsehal maoy gisangunan ni Rama pag-monitor sa tanang police station partikular na sa gipatuman nilang security measure sa ilang Area of Responsibility (AOR).
Subay niini, mapasalamaton si Rama sa kapulisan uban sa mga civilian volunteer, ilabi na sa Parish Security Group nga giingong aktibo nga niabag sa seguridad sa mga simbahan.
Ang bise mayor nga maoy chairman sa Police Coordinating and Advisory Council (PCAC) nipalanog usab sa iyang pagdayeg sa pagka-relihiyoso sa mga Sugbuanon.
“Bisan gani kadtong mga badlongon namahuway sab kay wala man ko kadawat og report nga dunay dagkong mga panghitabo sa siyudad sa nangaging mga adlaw,” sumala pa ni Rama.
Namatikdan hinoon sa Banat News nga gawas sa mga simbahan, labihang mingawa ang kadalanan sa siyudad sa miaging Huwebes ug Biyernes itandi sa ordinaryong mga adlaw.
Kini gitumbok ni Rama nga nakatampo sa pagkamalinawon sa kinatibuk-ang dakbayan tungod sa pipila ka mga adlaw nga walay klase ug walay trabaho.
Bugtong panghinaut sa bise mayor nga ipadayon sa kapulisan ang pagkamatinud-anon sa katungdanan bisan kung nahuman na ang Semana Santa.
Partikular na niini ang ilang pagkamabinantayon tungod kay kini giingong gikinahanglan sa tanang higayon ilabi na sa malambuon nga siyudad.
“It should never end after the lent, the vigilance has to be there at all times because it is a continuing concern,” dugang pamahayag sa bise mayor.