Arestado ang usa ka gidudahang tulisan human kini mapusili sa walang bitiis sa usa ka off-duty nga polis dihang kini misuway og tulis sa usa ka pasaherong babayeng tinun-an niadtong milabay’ng hapon diha sa dalan Archbishop Reyes sa barangay Apas ning dakbayan.
Ang natapsingan sa bala mao si Eddie Gabasa, 27, taga barangay Binaliw ug nadakpan dihang kini gigukod ug gipusil ni PO1 Remes Goco nga sakop sa Mobile Patrol Group.
Ang gitulis niini mao si Ann Margarette Noval, tinun-an sa usa ka unibersidad ning dakbayan luwan sa usa ka PUJ dihang kalit nga gitiunan og kutsilyo sa kilid sa suspek.
Human makuha ang cellphone niini daling mikanaog si Gabasa apan nisinggit si Noval, si Goco kinsa nag-sibilyan niadtong tungura ug sakay gihapon sa maong jeepney daling milayat ug migukod sa suspek apan wala dayon kini mopatuo hinungdan nga gipusil kini.
Matud pa sa hepe sa MPG nga si Chief Insp. Arnel Banzon nagaras ra ang walang bitiis ni Gabasa ug daling nasikop.
Samtang usa ka giilang si Joselito Ancajas Ramirez, 36, nga taga barangay Kawit, Medellen ang gidakop sa MPG ug Special Weapons and Tactics diha sa dalan Palma sa barangay San Roque sa samang adlaw human kini magpabuto og armas.
Nisuway unta og tago si Ramirez sa iyang balay apan gisulod kini sa mga polis ug nakuha gikan kaniya ang usa ka Ingram submachine pistol nga may mga buhing bala apan walay napakitang lisensya.
Ang duha parehong gitanggong sa karsel sa CCPO.