Giawhag ni bokal Juan Bolo, chairman sa Committee on Education sa hunta probinsyal sa Sugbu ang mga opisyales sa Parents Teachers Community Association (PTCA) nga mo-report dayon ngadto ni Cebu Provincial Schools Division Supt. Dra. Serena Uy kun makadiskobre sila og mga binuang sa mga magtutudlo.
Giluwatan ni Bolo ang maong awhag gumikan sa taho nga dunay mga magtutudlo sa kabukiran nga mobiya sa ilang klase kay motambong kini og birthday party sa ilang mga kaubang magtutudlo.
Miingon usab ang bokal nga nakadawat usab siya og report nga dunay mga magtutudlo nga biyaan ang ilang klase kay namista kini sa laing lugar.
Matud ni Bolo nga kinahanglan hatagan kini og daling aksyon sa Department of Education (DepEd) aron kasilotan ang magtutudlo nga nagligoyligoy sa ilang trabaho.
Dili lang ang mga opisyales sa PTCA ang giawhag sa pag-report niini lakip usab ang mga ginikanan aron maaksiyonan dayon sa mga kadagkuan sa DepEd ang ingon niining mga binuhatan sa mga magtutudlo.