Laing piniriso nga nag-atubang og kasong murder ang naka-eskapo didto sa detention cell sa Carmen Police Station sa lungsod sa Carmen niadtong milabay'ng adlaw'ng Domingo sa alas 9 sa gabii.
Ang naka-eskapo nga piniriso naila sa pangalan nga si Gelacio Villanueva, Jr., molupyo sa barangay Corte nahimutang sa bukirang bahin sakop sa maong lungsod ug nag-atubang og kasong murder sa Regional Trial Court RTC Branch 25 sa Danao City.
Gibutyag ni SPO2 Mario Giangan sa Carmen Police Station sa dihang nahinabi sa Banat News gihatagan og higayon ang maong piniriso nga makagawas sa detention cell sa pagkahapon niadtong Domingo aron magka estorya sa iyang live-in partner nga si Milagros Lumen nga mi-"dalaw" niadtong tungora.
Apan wala mabantayi sa kapolisan nga misibat ang maong piniriso ug sa dihang ila kining gipangita nianang alas 9: sa gabii aron unta ibalik sa selda wala na kini sa palibot sa estasyonan.
Si Villanueva mo-duha ka tuig nang nabalhog sa bilanggoan tungod sa kasong murder.
Matud ni SPO2 Giangan gidudahan nila nga nakigkunsabo ang live-in partner sa pag-eskapo ni Villanueva tungod kay namatikdan niini nga nagdala kini og bag nga gituohan nilang dunay sulod nga mga sinena ingon man plastic bag nga puno sa kinompra.
Pagkakaron nagpadayon ang manhunt operation sa kapolisan sa Carmen aron masikop og balik ang maong piniriso apan negatibo ang resulta sa gihimo nilang pakisusi sa pinuy-anan niini didto sa bukirang barangay sa Corte.
Ang mga police on-duty dihang nahitabo ang maong pagpuga gilangkoban nila ni SPO2 Simplicio Gibo, SPO1 Benjamen Giango, SPO1 Isidro Tagalog, PO3 Agustin Bejoc, PO1 Ricky Linawagan ug PO1 Walter Quirol.
Hinuon, dili na ihinayon ang pag-relibo sa mga polis nga ma-eskapohan human gibakwi ni Cebu provincial police chief Carmelo Valmoria.
Tungod niini, ang hepe sa Carmen nga si Insp. Carls Reyes Jr. ug si Insp. Romeo Santander sa Minglanilla nga gi-eskapohan usab og piniriso magpabilin sa puwesto.