Gitinguha sa kagamhanan sa lungsod sa Consolacion nga makapadayon sa ilang pagtungha sa kolehiyo ang mga kabataan nga anak sa kabus nga ginikanan pinaagi sa pagpatukod og kaugalingong tulunghaan.
Si Konsehal Aurelio Arnulfo Abinales maoy nangamahan sa resolusyon nga maoy pagabasehan alang sa pag-umol og komite nga maoy tahasan sa paghingpit sa katukoran sa maong tulunghaan sa kagamhanan.
Ubos sa gipalabang nga resolusyon ni Abinales ang maong tulonghaan pagatawgon og Consolacion Community College.
Kini magtanyag og mga advance education alang sa mga tinun-an nga naglakip sa technological, professional ug vocational nga kurso ug labi na gayod sa science arts, information technology ug uban pa.
Nisuporta ang mayoriya sa konseho ang katukoran sa tulonghaan aron pagahatag og kahigayonan sa kabus nga kabataan nga makadayon sa ilang pagtungha sa pagkuha og kurso sa kolehiyo.
Ang mipadayag sa ilang suporta sa katukoran sa maong tulunghaan sa kagamhanan mao sila si Konsehal Blesilda Villo, Alfred Francis Ouano, Bienvenido Ermac, Benedicto Abucay, Arturo Quimod ug Basilio Mangubat.