Tulo na ka mga pugante ang nadakpan pagbalik sa kapolisan sa lungsod sa Minglanilla human sa ilang pag-eskapo niadtong Miyerkules sa gabii sulod sa detention cell pinaagi sa pagbangag sa bongbong kilid sa pansayan.
Sa miaging gabii si Maurice Tan Tompong “Alias” Bobong, 31, nasikop pagbalik didto sa ilang pinuy-anan sa Ward 2 sa maong lungsod sa nagpadayong manhunt operation sa kapolisan nga gipangulohan sa hepe nga si Sr. Insp. Romeo Santander.
Una nang nasikop ang duha nga sila si John Mark Secuya ug Stephen Pinili Tan niadtong Huwebes sa buntag diha sa Escario barangay Capitol Site ning dakbayan sa Sugbu.
Sa pagkakaron bugtong wala pa madakpi mao si Felipe Largo nga taga Lutopan kinsa nag-atubang og kasong theft.
Matud ni PO2 Avelino Seloria nga nahinabi sa Banat News nga dili nalang nila iapil sa manhunt operation ang humablos ni konsehal Ramsey Sayson nga si Carlos Sabalones tungod kay gipaslak lang sa prisohan aron ma-rehabilitate kini.
Suma pa ni Seloria wala nay piniriso ang ilang detention cell tungod kay gi-remand na sa Bureau of Jail Management and Penology (BJMP) diha sa Tulay sa maong lungsod ang nadakpan og balik lakip na si Jeno Labado nga wala moapil sa pagpuga niadtong Miyerkules.
Nipadayag si PO2 Seloria nga niadtong Miyerkules ni-duty siya nianang pagka buntag apan pagka alas 10 nananghid siya sa ilang deputy nga si SPO4 Remegio Elacion nga magpa medical check-up tungod sa iyang ubo nga gahi kaayo ug mosakit ang iyang buko-buko.
Nasayran nga nahitabo ang pagpuga sa lima ka piniriso alas 10 ngadto sa alas 11 na sa gabii.