Sa labing unang higayon, usa ka dalagita nga sibilyan ang gipasidunggan sa Cebu City Police Office tungod sa pagtabang niini pagsikop sa usa ka tulisan nga nanulis og laing babaye diha sa dalan Osmeña Blvd. atubangan sa Abellana National High School.
Ang gipasidunggan mao si Rocelyn Laurencia Binoya, kinsa wala magduha-duha sa paggukod sa tulisang mitulis sa usa ka giilang Jazzel Abellana sa cellphone niini niadtong Pebrero 12.
Ang tulisan nga iyang gigukod ug gisuklan nadakpan dayon sa naaging mga barangay tanod sa Sambag 1 nga sila si Camilo Lañas Intia ug Nestor Misagel Delan.
Giila ang tulisan mao si Niño Bedoya Oraga kinsa gikasuhan na karon og pagpanulis ngadto sa korte.
Matud pang Sr. Supt. Patrocinio Comendador, director sa Cebu City Police Office ang paghatag og pasidungog ngadto sa mga sibilyan ug sa mga tanod pamaagi aron awhagon ang katawhan sa paglihok kontra krimen.
“Giving commendations to them (civilians and tanods) is to encourage them to join the fight against crimes, anang paagiha siguro ang mga tulisan ug dautang elemento magduha-duha na,” asoy pang Comendador.
Si Binoya gamayon nga babaye apan wala kini makapahadlok kaniya pagtabang sa biktima ug nigukod ug nisukol sa maong tulisan, sumala pang Comendador.
Samtang duna pay laing mga tanod ang gikatakdang hatagan usab og pasidungog tungod gihapon sa maayo nilang nabuhat.