Polis nga nadestino sa Cebu City Police Office (CCPO) dinhi sa dakbayan sa Sugbo gipasanginlang nangulata sa usa ka mahuyang nga magtutudlo sa usa ka imnanan didto sa terminal sa dakbayan sa Toledo kagahapon sa alas 2:20 sa kaadlawon.
Ang biktima nga midangop sa buhatan sa kapolisan kagahapon sa buntag nagpaila nga usa ka Owen Dejarme, 26, ulitawo, molupyo sa Loray-II sakop sa nahisgutang siyudad, usa ka magtutudlo sa publikong tunghaan sa sekondarya sa Toledo ug giingong usa ka mahuyang.
Samtang ang iyang gipasanginlan nga mikulata kaniya mao ang usa ka PO1 Rodney Cambarijan nadestino sa CCPO ug lumad nga taga barangay Ibo sa maong siyudad.
Gibutyag ni SPO4 Edgar Noel sa Toledo City Police Station dihang nahinabi sa Banat News mipasangil ang biktima nga samtang nag-inom sila kauban ang iyang mga higala sa usa ka imnanan sa terminal kagahapon sa kaadlawon kalit lang miabot ang duha ka lalaki nga nagsakay og traysikad.
Gibutyag sa biktima nga kalit lang siyang giduol ug gihapak ang iyang bukobuko sa puloan sa armas niini sa walay daghang estorya ug pagkahuman gipatiran siya.
Matud ni SPO4 Noel gidugang sa biktima nga dihang hapit siya matumba mipunit og basiyo sa beer si PO1 Cambarijan ug gibunal kini sa iyang ulo ug gisultihan pa siya nga “i-salvage taka ron”.
Gikuha pa gyud sa maong polis ang iyang cellphone nga Motorola nga mokantidad og P10 mil ug gibunal kini sa semento ug naguba.
Samtang si PO1 Cambarijan misumbalik usab sa pagpa-blotter ug gireklamo niini si Dejarme nga maoy iyang gituohan nga ni-harass kaniya.
Subay sa sumbalik nga alegasyon ni PO1 Cambarijan dihang gibasa ni SPO4 Noel ang blotter gibutyag niini nga nianang 1:30 kagahapon sa kaadlawon nagbarug siya sa dalan gawas sa ilang pinuy-anan kauban ang iyang ig-agaw nga si Oliver Pajaganas kalit lang dunay milabay sa ilang duol nga motorsiklo nga dunay sakay duha ka tawo.
Pag-abot niini sa ilang tungod nagpasalba kini ug deretso og padagan sa gisakyan niining motorsiklo paingon sa Poblacion, Toledo.
Gituohan ni PO1 Cambarijan nga ang maong duha ka lalaki usa niini si Dejarme maoy iyang gikalalis sa imnanan nianang pagka sayo pa. (Darrel A. Carumba)