Gihimoan gilayon og aksiyon kagahapon sa hapon ni Kapitan Felix Abella sa barangay Labangon ang reklamo sa mga residente diha sa Bugnay 2 Labangon Bliss nga gipadangat sa Banat News Banati labot sa pinahimong kanal nga gipaagi usab sa ilang main nga kuhaan og tubig.
Si Abella nga gikahinabi sa Banat News mipasabot nga kagahapon pa niya nahibaloan ang maong isyu human sa pag-interview sa Banat News kaniya labot sa maong problema kini tungod kay wala gyud siyay nadawat nga complaint niini diha sa barangay.
Gipadayag sa kapitan nga ang maong isyu iyang gipadangat gilayon kagahapon didto sa buhatan sa Pilipinas Water Resources kinsa maoy nag-layout ug nagpatuman sa maong proyekto sukad sa miaging tuig.
Matud pa niini nga 200 ka pamilya ang nakabenepisyo niini dihang gipatukod ang proyekto, apan nakurat na lang siya nga adunay mga reklamo nga nadangat sa Banati nga adunay hugaw nga ipagawas sa maong kanal panahon sa kagabhion.
Nunot niini, iya gilayong gipa-check ang maong report aron kapangitaan og solusyon ang maong problema, apan iyang giawhag ang mga residente sa maong dapit nga mopahibalo unta sa ilang mga problema diha sa barangay.