Mokabat sa P10 milyones ang kantidad sa 32 ka mga luhong sakyanan nga gikonpiskar sa mga sakop sa Bureau of Customs human kini gipayuhot dinhi sa Sugbu.
Atol sa pag-abli sa walo ka mga 40 footer container vans, personal nga gisaksihan ni Customs Commissioner Napoleon Morales, X-ray Inspection Project head Ma. Lourdes Mangaoang ug Cebu Customs District Collector Ricardo Belmonte ang pag-inspeksiyon sa 32 ka mga luhong sakyanan diin upat niini ang mga brand new gikan sa nasud sa Korea.
Base sa inspection report nasuta sa mga manifesto nga pulos mga misdeclared items ang kargamento human makita sa X-ray machine nga lahi ang sulod niini kaysa gibutang sa manifesto nga pulos mga used replacement truck parts nga nakalapas sa Sec. 2503 sa Tariff and Customs Code of the Philippines gumikan sa pagmisdeklarar niini.
Base sa maong manifesto, ang mga consignee sa tulo ka mga 40 footer vans mao ang Trex Eve Auto nga nagbase sa AS Fortuna St. dakbayan sa Mandaue diin adunay 12 ka mga units nga Sportage ug tulo ka Galloper nga miabot niadtong Pebrero 7 ning tuiga gikan sa nasud sa Korea luwan sa MV Maas Trader
RCY Trading sa Mandaue City diin ang duha ka container vans adunay sulod nga tulo ka brand new Starex van ug usa ka Hyundai Santa Fe nga miabot dinhi sa Sugbu niadtong Enero 24, 2008 gikan sa nasud sa Korea luwan sa MV Maas Trader.
OSSJ Surplus sa Buyong Maribago dakbayan sa Lapulapu nga adunay duha ka mga container vans nga ang sulod tulo ka units sa Accent, upat ka Sportage, 2 ka Galloper ug usa ka scooter nga miabot niadtong Enero 26 gikan sa Korea luwan sa MV Eagle Excellence.
Ang usa ka container van adunay sulod nga usa ka Honda CRV, usa ka Honda Civic, usa ka Pajero ug usa ka Bighorn trooper nga pulos mga right hand drive miabot niadtong Enero 29 gikan sa nasud sa Japan.
Matud pa ni Coll. Belmonte human sa 30 ka adlaw nga ilang gitagal ngadto sa mga consignee niini nga ilang sakmiton ang maong mga kargamento.
Matud pa ni Morales nga kini nagpakita na usab sa kaseryoso sa BOC sa ilang kampanya sa mga palusot sa mga luhong sakyanan dinhi sa nasud ug partikular sa dakbayan sa Sugbu
Dugang pa ni Morales nga ang BOC padayon makigkombate sa mga importer nga mosuway og palusot sa bisan unsang matang sa smuggling dinhi sa nasud pinaagi sa ilang paghingusog sa ilang X-ray machine nga moderno ug dali makakita sa tinud-anay nga sulod sa usa ka container van.
Samtang si Mangaoang usab sa iyang bahin miingon nga ang paggamit sa X-ray machine maoy labing bag-ong paagi sa BOC sa pagsumpo sa gipayuhot nga mga sakyanan ug uban pang matang sa mga taas nga kantidad ug taas nga buluhisan nga mga butang nga buot ipalusot.