Di mga sakop sa Philippine Drug Enforcement Agency ang upat ka mga lalaking nadakpan sa mga sakop sa Lapulapu City Police Office niadtong Sabado dihang nagpahigayon og “buy-bust” operation sa maong lugar.
Si Intelligence Officer 2 Levi Valmoria, tigpamaba sa PDEA-7 sa pakighinabi sa Banat News mitug-an nga wala sila’y sakop nga susama og mga pangalan ug wala sad sila’y operasyon nianang adlawa diha sa maong barangay.
“Wala mi kaila ana nila. Mga mini na sila kay kung asset pa na namo duna gyud na sila’y ID ug dunay kaubang organic agent namo,” asoy pang Valmoria.
Ang nangadakpan giilang sila si Ariel Amoro Cacha alyas Paner, 34; Christopher Ybañez, 27, parehong taga Basak, Lapulapu; Felix Villamor Lungat, 25 ug Beinvenido Lanot Mara-mara, 34, parehong taga Back Pepsi sa barangay Mabolo ning dakbayan.
Ang upat unang gialarmang mga armadong tawo diha sa maong dapit hinungdan nga miabot ang mga sakop sa Theft and Robbery Section pinanguluhan ni Sr. Insp. Conrado Manatad.
Dihang giduol, ang upat nangangkong sila mga sakop sa PDEA-7 ug nagpahigayon sila og buy-bust operation batok kang Junrey Romero Palomar, 20, residente sa maong dapit.
Si Palomar mitug-an nga gidakop siya sa upat sa walay igong hinungdan ug gipasanginlang tigpayuhot og iligal nga drogas diha sa maong barangay.
Dihang gipangayoan og mga identification cards ang upat wala sila’y napakitang pagmatuod nga sila mga miyembro sa PDEA hinungdan nga sila gipangdakop.
Ang kapolisan nakakuha og usa ka .38 caliber revolver kang Cacha, may unom ka buhing bala; usa ka posas,12 ka paketeng may sulod nga gidudahang shabu; kang Mara-Mara nakuha usab ang usa ka .38 snubnose revolver nga may lima ka buhing bala ug siyam ka paketeng may sulod nga gidudahang shabu.
Samtang nakuhaan usab sila si Lungat ug Ybañez og lima ka paketeng may sulod nga gidudahang shabu samtang nakaikyas ang lain pa nilang kauban nga giilang si Maximo Catipay,Jr. alyas Turagsoy nga taga Back Pepsi sa Mabolo kinsa nakuhaan gihapon og pito ka paketeng gidudahang shabu.
Si Sr. Supt. Louie Oppus, director sa LCPO sa pakighinabi sa Banat News mitug-an nga dako ang iyang pagtuong dunay mga dagkong opisyales sa serbisyo nga nagpaluyo sa grupo.
Nagtuo usab kining ‘hulidap’ ra gyud ang tuyo sa grupo aron makakwarta. Gisusi na hinuon ni Oppus kung tinuod nga nalambigit sa drogas si Palomar.
“Kung tinuod pa silang mga PDEA mo-coordinate unta sila daan namo kay mao man nay base sa direktiba sa PNP nga mananghid gyud sa territorial unit ang mooperate gikan sa ubang unit,” asoy pang Oppus.
Miangkon hinuon si Valmoria nga sa pagkakaron ang PDEA-7 nagsalig sa mga civilian agents nga maoy mohatag og impormasyon kanila kabahin sa mga illegal drug operations dinhi.
Samtang iyang gitug-an nga daghan na silang report nga nadawat nga may mga tawo ug grupong gamiton ang pangalan sa PDEA sa wala matinong rason gawas lang niadtong mga mangwartahay.