Gidunggab ang usa ka habal-habal drayber sa bana sa iyang pasahero human kini mag-selos tungod sa hugot nga paggakos sa iyang asawa ngadto sa drayber ug wala pa gyud kini pa-pleteha dihang gihatod sa ilang pinuy-anan sa Sityo Gaway-gaway, barangay Tigbao, lungsod sa Badian niadtong Sabado sa alas 4:30 sa hapon.
Ang biktima naila nga si Orlando Villegas, 22, ulitawo, molupyo sa barangay Mali-ao sakop sa maong lungsod ug usa ka habal-habal drayber.
Samtang ang suspek naila sa pangalan nga si Ritchie Cabalay, 27, molupyo sa mang lugar.
Gibutyag ni PO1 Euberto Alcarazen dihang nahinabi sa Banat News nga samtang gihatod sa biktimang habal habal drayber ang asawa sa suspek paingon sa ilang pinuy-anan giingong hugot kaayo nga nakagakos ngadto sa drayber ug paghunong sa ubos sa ilang pinuy-anan wala pa gyud kini pa-pleteha.
Kini maoy hinungdan nga dali kaayong naka-ambak ang suspek gikan sa taas paingon sa silong ug gideretso ug dunggab sa dala niining kutsilyo ang biktima sa walay daghang pangutana.
Matud ni P1 Alcazaren nga maoy usa sa mga nakadakop sa suspek nga gitug-an gyud niini nga nagselos siya sa maong habal-habal drayber dihang iyang nakita nga hugot kaayo kining nakagakos samtang nagsakay sa motorsiklo ug misamot ang iyang pangabubho dihang wala pa gyud pabayra og plete ang iyang asawa pagkanaug.
Maayo na lang gani kay nakabantay ang biktima ug nakasagang kini hinungdan nga ang walang bukton niini maoy naigo sa pagdunggab.
Daling gidala sa Badian District hospital ang biktima og girekomendar kini nga ibalhin sa Vicente Sotto Memorial Medical Center (VSMMC) alang sa operasyon sa walang bukton niini.
Ang suspek misulay unta pag-eskapo apan nadakpan kini sa kapolisan duol sa tennis court sa maong lugar pipila ka oras human sa hitabo ug gibalhog na karon sa detention cell sa maong lungsod samtang gi-asikaso sa kapolisan ang pagpasaka og kaso karong adlawa. (Darrel Carumba)