Tulo ka mga lalaki ang nasikop sa pagpamaligya og shabu atol sa buybust operation sa kapolisan sa Sitio Saac Barangay Buaya dakbayan sa Lapulapu sa milabay’ng gabii.
Ang nasikop mao sila si Abdul Daftar Mapandi, 19 ug Alnur Ampaso Ameril, 34, pulos mga lumad sa Magsaysay, Lanao del Norte diin temporaryong nagpuyo sa Basak dakbayan sa Lapulapu.
Samtang lain pang suspetsadong nasikop mao si Noel Catellar Merlin, 34, ug lumad sa San Vicente Barobo sa Surigao del Sur ug kasamtangang nagpuyo sa Sitio Locatha Looc dakbayan sa Lapulapu.
Matud pa ni P/SInps. Condrado Manatad ang hepe sa Operation Section sa Lapulapu Police nga dugay na nilang gipanid-an ang mga suspetsado ug sa dihang mihatag og positibong impormasyon ang ilang mga asset wala sila maglangay ila dayong gihimo ang buybust operation.
Atol sa maong operasyon nagtambayayong ang tulo ka suspetsado sa pagpamaligya og drugas ug sa dihang ila nang nahatag ang balor 100 ka pesos nga marked money dali nga gisikop ang tulo ka mga suspetsado.
Nakuha usab sa ilaha ang walo ka mga gagmay’ng pakete sa gituhuang shabu, gami sa pagsuyop ug drugas, 2 ka cellphone, 400 cash nga gituhuan halin sa pagpamaligya ug ang XRM nga motor nga gigamit sa ilang operasyon sa pagpamaligya og drugas.
Si Mapandi, Ameril ug Merlin anaa na karon gibalhog sa detention cell sa kapolisan sa dakbayan sa Lapulapu.