Giawhag ni Cebu Governor Gwendolyn Garcia ang bag-ong Provincial Schools Division Superintendent nga si Serena Uy nga mohimo og lakang aron lig-onon ang sestima sa edukasyon sa Sugbu.
Giluwatan sa gobernador ang maong awhag human nangiwit ang mga tinun-an sa ubang kalungsoran sa probinsya sa Sugbu sa milabay’ng National Achievement Test (NAT).
Samtang atol sa gipahigayong Schools Board Meeting sa miaging adlaw diha sa Kapitolyo, gisukit-sukit sa gobernador si Superintendent Uy kun unsay hinungdan nganong miubos ang kalidad sa edukasyon sa ubang tulunghaan sa elementarya sa probinsya sa Sugbu.
Gikatahong ang mga bag-ong magtutudlo sa publikong tunghaan sa kalungsoran sa probinsya maoy gibasol sa low performance sa mga tinun-an sa probinsya sa milabay’ng NAT.
Tungod niini ang departamento sa edukasyon mirekomendar nga ipaubos sa basic orientation seminar ang tanang bag-ong magtutudlo karong summer.