Makigtagbo ngadto ni Presidente Gloria Arroyo didto sa Malacañang karong buntag ang kadagkuan sa transport group dinhi sa Sugbu.
Gibutyag ni Citrasco Managing director Ryan Yu kauban nila sa pakigpulong ngadto sa presidente karong buntag ang mga lider sa transport group didto sa kaulohan.
Gitug-an ni Yu nga sentro sa ilang gihisgutan ug gipaabot ngadto sa presidente atol sa maong tigum ang ilang gidemanda nga petisyon alang sa dugang usbaw sa pletihan ingon man ang giduso nga lakang sa transport group pagpatuman sa “single ticketing system” sa Land Transportation Office (LTO).
Gipasabot ni Yu nga nagkahiusa silang mga transport group dinhi sa Sugbu ug Manila pagduso sa maong mga demanda direkta ngadto sa presidente human gihulagway niini karon nga na-apeke silang mga operator ug drayber gumikan sa nagpatong-patong nga mga violations.
Gireklamo sa Citrasco ug uban pang transport group ang pagpanakop usab sa Citom dinhi sa dakbayan nga mo-isyu og mga citation ticket ingon man sa mga silingang dakbayan sama sa Mandaue, Lapulapu ug Talisay gawas sa mga LTO-agent nga mo-isyu og mga temporary operators permit (TOP).
Matod ni Yu sa single ticketing system nga ilang giduso sa presidente gusto nila nga bugtong ang LTO na lang gyud ang hatagan og katungod nga makapanakop ug maka-isyu og TOP sa ilang mga drayber nga makahimo og mga violation sa lagda sa trapiko.