Nahunong ang gihimong pagdungog sa pre-trial conference tali sa kampo sa suspek sa drive-by shootings human ang inahan sa usa sa mga biktima nga mitambong nag-hysteria ug nawad-an og panimuot diha sa sulod sa RTC Branch 9.
Sa video footage sa Balitang Bisdak kagahapon, mismong si Judge Geraldine Faith Econg, hukom sa nahisgutang korte nibiya mismo sa iyang pwesto ug miapil sa pagtabang kang Mimi Vasquez, inahan sa biktimang si Lord Stephen Vasquez,18.
Ang maong kaso may labot sa drive-by shootings nga nahitabo sa milabay'ng tuig nga miresulta sa kamatayon sa tulo ug pagkaangol sa lima diin gitumbok nga suspek mao ang gipasanginlang notadong hitman sa fraternity nga si Aristotle Aves.
Si Aves gipresentar kagahapon diha sa korte alang sa maong pre-trial ug dihang gibasahan sa kasong gipasangil batok kaniya kini mi-plead not guilty, kini miresulta sa pagdanguyngoy sa inahan ni Vasquez kinsa naglingkod diha sa usa ka daplin.
Bisan paman gitabang si Mimi Vasquez wala gyud kini maulii ug nawad-an kini sa panimuot hinungdan nga gitawgan ang Emergency Rescue Unit Foundation ug gidala kini sa tambalanan.
Samtang gimando usab ni Econg aron di na masubli ang susamang insidente kagahapon sa pag-oktaba sa pre-trial ni Aves ug isibog karong Pebrero 27.
Si Aves gikuyogan sa iyang manlalaban gikan sa Public Attorney’s Office samtang giatbangan usab kini og lima ka mga private prosecutors sa mga kabanay sa iyang mga biktima.
Si Aves naaresto niadtong bulan sa Disyembre diha sa usa ka pantalan sa Mandaue City samtang padulong sa Ormoc City.