Higpit nga na nga gidili sa kagamhanan sa dakbayan sa Mandaue ang pagpataka og labang sa dalan nunot usab sa pagpatuman sa Ordinance Number KK/036 o gitawag og Jaywalking Ordinance.
Si PNP Retired Police Chief Inspector Cristobal Guido, executive officer sa Traffic Enforcement Agency of Mandaue (TEAM) nga nahinabi sa Banat News ang mipadayag niini.
Ang Jaywalking Ordinance nga higpit na nga ipatuman sa dakbayan ang gipanday sa panahon pa sa 8th Sangguniang Panglungsod sa dakbayan ug giaprobahan ni kanhi Mayor Thadeo Ouano.
Si Guido miingon nga ang ordinansa nga jaywalking dili lamang gitumong alang sa paghatag og kasiguroan sa mga tawo nga molabang sa dalan kun dili makatabang usab kini alang sa paghapsay sa kadalanan.
Ubos sa section 1 sa ordinansa sa jaywalking ang madakpan nga magpataka lang og labang makapabayad og multa nga P20 ug dili usab molabaw sa P500 o mabalhog sa bilanggoan sulod sa usa ka adlaw.
Ang makolekta nga multa dako og ikatabang alang sa pagpausbaw sa salapi sa kagamhanan.