Mga suga sa poste diha sa daplin sa karsada habig sa South Coastal Road sa Barangay Mohon dakbayan sa Talisay wala mosiga tungod kay ang mga wire niini gipangawat.
Ang maong insidente nadiskitaan kagahapon sa buntag ni William Solana, 42, electrician sa siyudad kinsa daling mitaho diha sa kapolisan sa barangay Poblacion kabahin sa maong insidente.
Base sa imbestigasyon ni PO3 Rico Emperwa nga nahibulong si Solana nga wala na mosiga ang mga suga sa poste diha sa nahisgutang lugar hinungdan nga iya kining gisusi.
Nasuta ni Solana nga ang 40 metros nga aluminum wire nga gikonektar gikan sa poste sa Visayan Electric Company isip main line paingon ngadto sa mga poste sa siyudad giputol ug gikawat sa wala mailhing kawatan.
Kahinumduman nga dili lang mga wire sa kuryente ang pangawaton sa mga kawatan ug gani dihay higayon nga nawagtangan sa linya sa telepono ang city hall sa Talisay nga nahimutang diha sa barangay Mohon lakip na ang mga residente sa lugar tungod kay ang mga kable sa telepono gipangawat usab.
Kahinumduman usab nga adunay mga residente sa dakbayan sa Talisay ang magdahom nga nag-brown-out tungod kay dili mosiga ang ilang mga suga ug dili usab moandar ang ilang mga appliances apan inig susi pa nila gikawat na diay ang ilang wire kinsa ang mga kawatan walay kahadlok nga moputol sa wire gikan sa poste sa VECO.